دنیا بھر میں تیزی سے پھیلنے والا خطرناک مرض کینسر اب موٹاپے سے بھی جُڑا پایا گیا ہے۔ حالیہ تحقیق نے ثابت کیا ہے کہ موٹاپا کینسر کے خطرے کو بڑھا دیتا ہے، خاص طور پر آنتوں اور معدے کے کینسر میں۔
ایک طبی تحقیق کے مطابق، اگر آپ کا وزن زیادہ ہے، خاص طور پر پیٹ اور کمر کے ارد گرد چربی جمع ہو رہی ہے، تو آپ کو آنتوں کے کینسر کا خطرہ 25 فیصد زیادہ ہو سکتا ہے۔
ماہرین کا کہنا ہے کہ موٹاپا جسم میں ورم پیدا کرنے والے کیمیکلز بڑھاتا ہے اور انسولین کے عمل میں تبدیلی لاتا ہے، جس سے کینسر کی رسولیاں تیزی سے بڑھتی ہیں۔
تحقیق میں یہ بھی کہا گیا ہے کہ فاسٹ فوڈ اور جنک فوڈ کا زیادہ استعمال خطرناک ہو سکتا ہے کیونکہ ان میں چینی اور چکنائی کی مقدار بہت زیادہ ہوتی ہے، جو آنتوں کے امراض اور کینسر کا خطرہ بڑھاتی ہے۔
اس کے برعکس، اگر ہم پھل، سبزیاں اور صحت مند غذا استعمال کریں، تو صرف کینسر ہی نہیں، بلکہ دل کی بیماریوں اور ذیابیطس جیسے امراض سے بھی بچ سکتے ہیں۔
ماہرین کا مشورہ ہے کہ وزن کو قابو میں رکھیں، صحت مند غذا کھائیں اور متحرک طرزِ زندگی اپنائیں تاکہ خود کو اور اپنے پیاروں کو کینسر جیسے مہلک مرض سے بچایا جا سکے۔