بھارتی کرکٹ اسٹار ویرات کوہلی کے ہم شکل ایک ننھے بچے کی ملاقات نے سوشل میڈیا پر دھوم مچا دی۔ ننھے گروِت اُتم، جو ہریانہ کے شہر پنچکولا سے تعلق رکھتے ہیں، کی معصومیت اور ویرات کوہلی سے حیران کن مشابہت نے مداحوں کے دل جیت لیے۔
موقع ایسا تھا کہ نیوزی لینڈ کے خلاف ایک روزہ میچ سے قبل ویرات کوہلی نے جب اسٹینڈز میں ننھے گروِت کو دیکھا تو مسکرا کر انہیں پیار سے ’چھوٹا چیکو‘ کہا۔ اس دوران ویرات نے بھارتی ٹیم کے کپتان روہت شرما کو بھی بلایا اور ہنستے ہوئے کہا:
"ادھر دیکھو، میرا ڈپلیکیٹ بیٹھا ہے!"
گروِت نے بتایا کہ وہ خود بھی ویرات کی طرح دائیں ہاتھ سے بیٹنگ کرتے ہیں اور ویرات ان کے پسندیدہ کھلاڑی ہیں۔ سوشل میڈیا پر وائرل ویڈیو میں یہ لمحہ مداحوں کو بہت بھایا اور ’چھوٹے چیکو‘ کی شکل میں ننھے گروِت نے لمحوں میں مداحوں کے دلوں میں جگہ بنا لی۔
صارفین نے ویڈیو پر تبصرے کرتے ہوئے ننھے گروِت کو ویرات کوہلی کا چھوٹا ورژن قرار دیا اور ان کے ساتھ ویرات کے دوستانہ انداز کی تعریف کی۔
یہ دلچسپ اور دلکش واقعہ نہ صرف بچے کے لیے یادگار رہا بلکہ سوشل میڈیا پر بھی ہزاروں افراد نے شیئر اور کمنٹس کے ذریعے اپنی خوشی کا اظہار کیا۔